កប់ក្តោង! ត្រាំ រៀបចំលក់យន្តហោះដ្រូនស៊ើបការណ៍ តម្លៃ២ពាន់លានដុល្លារ (មានរូប)

យោងតាមសារព័ត៌មានរុស្ស៊ី Sputnik បានចុះផ្សាយ នៅព្រឹក​ថ្ងៃព្រហស្បតិ៍ ទី២៩ ខែមិថុនា ឆ្នាំ២០១៧ ការលក់យន្តហោះ​ដ្រូនស៊ើបការណ៍ មានតម្លៃជាង​២ពាន់លានដុល្លារ​ ពីអាមេរិក ទៅឲ្យប្រទេស​​ឥណ្ឌា​​នោះ​ ទទួល​បាន​ការ​យល់​ព្រម​​ពី​សេតវិមាន​របស់ លោក ដូណាល់ ត្រាំ ហើយ ក៏ប៉ុន្តែ​កិច្ចព្រមព្រៀង​នេះចាំ​បាច់​​ត្រូវ​តែ​ទទួល​បាន​ ការ​អនុញ្ញាត​ពី​សភា​មួយ​ដំណាក់កាល​ទៀត ។

ក្នុងនោះដែរ លោក Linden Blue នាយកប្រតិបត្តិ​របស់ក្រុមហ៊ុន​អភិវឌ្ឍន៍សព្វាវុធ General Atomics Aeronautical Systems បានបញ្ជាក់​នៅក្នុងសេចក្តីថ្លែង​ការណ៍​មួយថា យើងត្រេកអរ និងពេញចិត្ត​យ៉ាងខ្លាំងចំពោះ ​រដ្ឋាភិបាល​អាមេរិក បើកផ្លូវ​សម្រាប់កិច្ចព្រមព្រៀង​ ស្តីពីការ​លក់​យន្តហោះដ្រូន MQ-9B Guardian ទៅឲ្យរដ្ឋាភិបាល​ឥណ្ឌា ។

គួររំលឹកផងដែរថា អនុប្រធានាធិបតី​អាមេរិក លោក Mike Pence អាមេរិក​ក៏មានបំណង​លក់​ឧទ្ធម្ភាគចក្រចម្បាំង AH-64 Apache និងឧទ្ធម្ភាគចក្រ​ដឹកជញ្ជូន C-17 ទៅឲ្យប្រទេស​ឥណ្ឌាផងដែរ។ ម៉្យាងទៀត​អាមេរិក និងឥណ្ឌា ក៏គ្រោងចុះ​កិច្ចព្រមព្រៀងទិញលក់​​យន្តហោះ​ចម្បាំងធុន F-16 Fighting Falcon និង F/A-18 Hornet នាពេលអនាគត​ខាងមុខថែមទៀត ស្របពេលដែល​នាយក​រដ្ឋមន្រ្តី​ឥណ្ឌា​ កំពុងរៀប​ចំយន្តការ ដើម្បីបង្កើន​សមត្ថភាព​ការពារជាតិ​របស់ប្រទេស ៕