មន្រ្តីកាំកុងត្រូលសាខាខេត្តព្រៃវែង រកឃើញទឹកក្រូច តែបៃតង ប៊ឺ និងទឹកផ្លែឈើដែលខូចគុណភាព លក់ក្នុងផ្សារទានភ្លើង
(ព្រៃវែង)៖ មន្រ្តីកាំកុងត្រូលសាខាខេត្តព្រៃវែង សហការជាមួយមន្ទីរពាណិជ្ជកម្មខេត្ត នគរបាលប្រឆាំងបទល្មើសសេដ្ឋកិច្ចខេត្ត រួមជាមួយអាជ្ញាធរមូលដ្ឋាន នៅព្រឹកថ្ងៃទី១៤ ខែកក្កដា ឆ្នាំ២០១៧នេះ បានបន្តចុះអង្កេតទំនិញ តាមស្តង់ និងតូបលក់ទំនិញ នៅផ្សារទានភ្លើង ដែលស្ថិតនៅក្នុងភូមិទានភ្លើង ឃុំស្មោងខាងជើង ស្រុកកំចាយមារ ខេត្តព្រៃវែង ដោយរកឃើញ ទឹកក្រូច តែបៃតង ប៊ឺ ទឹកផ្លែឈើដែលខូចគុណភាព។
មន្រ្តីសាខាកាំកុងត្រូលខេត្តព្រៃវែង បានឲ្យដឹងថា ការចុះអង្កេតទំនិញនៅផ្សារទានភ្លើងនេះ គឺធ្វើតេស្តបឋម ទៅលើមុខម្ហូបមួយចំនួនដូចជា ៖ សាច់គោ សាច់ជ្រូក បន្លែ ផ្លែឈើ តែរកមិនឃើញផលិតផលណាមួយមានជាតិគីមីនោះទេ តែបានរកឃើញ ទឹកក្រូច តែបៃតង និងប៊ឺ ទឹកផ្លែឈើ ខូចគុណភាព និងហួសកាលបរិច្ឆេទដោយសរុបទាំងអស់ ៤៥គីឡូក្រាម។
មន្រ្តីកាំកុងត្រូលបានឲ្យដឹងថា ទំនិញខូចគុណភាពទាំងនេះ បានធ្វើកំណត់ហេតុដកហូត យកទៅរក្សាទុក ដើម្បីធ្វើការកំទេចចោល។ ឆ្លៀតឱកាសនោះដែរ ក្រុមកាងារក៏បាន ចែកផ្សាយនូវរូបភាព Poster និងផ្សព្វផ្សាយដល់អាជីវករអ្នកលក់ដូរ និងអ្នកប្រើប្រាស់ឲ្យបានយល់ ដឹងអំពីផលវិបាកដែលបណ្តាលមកពីការបរិភោគអាហារហួសកាលបរិច្ឆេទ ប្រើប្រាស់ និងការដាក់លាយបន្ថែមសារធាតុគីមី ហាមឃាត់ចូលក្នុងម្ហូបអាហារ។
មន្រ្តីកាំកុងត្រូល ក៏បានអប់រំ និងអំពាវនាវដល់អាជីវករ អ្នកលក់ដូរទាំងអស់ឲ្យប្រុងប្រយ័ត្ន និងយកចិត្តទុកដាក់ខ្ពស់ គឺលក់ដូរ និងចែកចាយតែទំនិញផលិតផលម្ហូបអាហារណា ដែលមានគុណភាព មិនប៉ះពាល់ដល់ សុខមាលភាព អ្នកប្រើប្រាស់៕
Comments
Post a Comment